प्रदेश १ प्रदेश सभाको बैठक आज, नामाकरण टुंगो लगाउनुपर्ने दबाब प्रकाशित मिति : ८ श्रावण २०७९, आईतवार ०८:३१ काठमाडौं । प्रदेश नं. १ प्रदेशसभाको बैठक आज बस्दैछ। आज दिउँसो १ बजेका लागि प्रदेशसभा बैठक बोलाइएको छ । प्रदेशसभाको बैठक गत असार १९ गते अर्को सूचना नभएसम्मका लागि स्थगन भएको थियो । प्रदेशसभा सचिव गोपालप्रसाद पराजुलीका अनुसार प्रदेशसभाको बजेट अधिवेशन जारी छ । प्रदेश नम्बर १ प्रदेशसभालाई आफ्नो यही अन्तिम कार्यकालभित्रै प्रदेशको नामाकरण टुंगो लगाउनुपर्ने दबाब छ । ७ प्रदेश मध्ये प्रदेश १ ले मात्र आफ्नो नाम राख्न सकेको छैन । नाम राख्ने विषयमा केहीदिन अघि सर्वदलीय बैठक पनि बसेको थियो । जसमा कार्यकालको अन्तिम अधिवेशनभित्रै नाम राख्नेमा सहमति जुटेको थियो । दलहरुबिच प्रदेश नम्बर १ को नाम ‘किरात’ राख्ने विषयमा छलफल भइरहेको छ । तर, सहमति भने जुट्न सकेको छैन ।
