विकेश चम्किँदा आर्मीलाई हेटौंडा गोल्डकपको उपाधि,

१२ फागुन, हेटौंडा । साबिक विजेता नेपाल आर्मीले दोस्रो पटक पनि हेटौंडा गोल्डकपको उपाधि उचालेको छ । नेपाल प्रहरीलाई टाइब्रेकरमा हराउँदै आर्मीले उपाधि चुमेको हो ।

अघिल्लो संस्करणमा मनाङ मस्र्याङ्दीलाई पाखा लगाउँदै आर्मी विजेता बनेको थियो । हेटौंडाको वन विज्ञान अध्ययन संस्थानको खेल मैदानमा शनिबार भएको खेलमा नेपाल पुलिसलाई टाइब्रेकरमा ४–३ गोलअन्तरले हराउँदै आर्मीले उपाधि जित्यो ।

उपाधि जितेसँगै आर्मीले नगद ५ लाखसहित मेडल र ट्रफी हात पारेको भने भने नेपाल पुलिस क्लबले ३ लाख रुपैयाँ, मेडल र ट्रफीमा चित्त बुझाएको छ ।

निर्धारित समयसम्म खेल गोलरहित बराबरीमा टुंगिएपछि निर्णयका लागि टाइब्रेकर रोजिएको थियो ।

पुलिसका तर्फबाट तेज तामाङ र बुद्ध लामाको प्रहारलाई आर्मीका गोलरक्षक विकेश कुथुले बचाउ गर्दै आफ्नो टोलीको जीत सुनिश्चित गराए ।